Skilalýsing
Húsin eru byggð úr samlokueiningum úr steinull og stáli, steingráum að utan og hvítum að innan. Neðri hæð í Mhl 03 er steypt úr forsteyptum einingum og klædd með samlokueiningum af sömu gerð og aðrar klæðningar húsa á lóðinni. Veggir og loft steyptra bila verða hvítmáluð. Gólf eru steypt og slípuð með vatnshalla að niðurfalli. Blinduð tengi fyrir neysluvatn eru aðgengileg í hverju bili og eru bilin upphituð með hitaveituofnum. Lóð skilast fullfrágengin, malbikuð og upplýst. Svæðið verður afgirt og aðgangi stýrt í gegnum tvö rafdrifin hlið. Tvenn sameiginleg salerni ásamt bílaþvottaaðstöðu eru á svæðinu, hvoru tveggja aðgengilegt hreyfihömluðum. Bílastæði í séreign fylgja öllum bilum í formi 35fm séreignarsvæðis fyrir utan hvert bil þar sem hægt er að leggja tveimur bílum. Vsk-kvöð er á bilunum.
Húsfélag
Húsfélag verður stofnað um eignina sem sér um allan sameiginlegan rekstur, þar á meðal ræstingu sameignahluta, aðföng, vetrarþjónustu lóðar, almenn þrif á lóð, rekstur á aðgangshliðum, myndavélakerfi o.þ.h. Öllum kaupendum ber að fylgja samþykktum húsfélags og greiða í hússjóð til að standa straum af sameiginlegum útgjöldum, sbr. lög um fjöleignahús.
Loftræsing
Í hverju bili verða tvær loftristar til að tryggja loftskipti, önnur neðarlega í hurð en hin ofarlega í vegg. Loftskipti eru náttúruleg, þ.e.a.s. án viftu, en hægt er að bæta viftu við á auðveldan hátt.
Frárennsli
Í hverju bili er niðurfall í gólfi. Tilbúinn 100mm skólpstammi (stútur) er í hverju bili, en í hann er hægt að tengja fráveitu, t.d. salerni, handlaug, vask eða sturtu.
Rafmagn
Þriggja fasa rafmagn er dregið í töflu og því auðvelt að setja upp og tengja þriggja fasa tengla.
10-16A einfasatenglar eru í rýminu, bæði á veggjum og í lofti.
Frádráttarmælir er í greinatöflu í hverju rými sem lesið er af til að gera upp rafmagnsnotkun hvers og eins, t.d. einu sinni á ári. Húsfélag ákveður útfærslu þessa nánar þegar húsfélag er komið er í fullan rekstur.
Ljósleiðari
Ljósleiðari er dreginn inn í hvert bil með endabúnaði sem tilbúinn er til tengingar við búnað (router) fjarskiptafyrirtækis. Því er auðsótt að fá tengingu internets inn í hvert bil.
Lýsing innandyra
LED ljós eru í lofti hvers bils sem veita góða almenna lýsingu.
Lýsing utandyra
Á hverju húsi eru upp/niður ljós með tveggja innkeyrsluhurða millibili sem lýsa samkvæmt sólúri og veita ratlýsingu. Ljósastaurar eru einnig á lóðinni sem lýsa skv. sólúri og veita góða almenna lýsingu.
Ljóskastarar eru fyrir ofan hverja hurð, sem lýsa eftir hreyfiskynjurum. Lóðinni er skipt í nokkur svæði þar sem kveikingar fara eftir staðsetningu þeirra sem hreyfa sig. Þeir veita góða flóðlýsingu í myrkri svo allir geti athafnað sig vel í svartasta skammdeginu.
Öryggismál og aðgengi
Lóðin er afgirt í heild sinni og tvö rafdrifin hlið sem stýra umferð inn og út af svæðinu. Aðeins aðilar á sérstökum aðgangslista geta opnað hliðin. Öryggismyndavélar verða við innkeyrslur sem vakta umferð inn og út af lóð.
Bílaþvottaaðstaða
Sérstök bílaþvottaaðstaða verður á svæðinu. Þar verður hægt að þvo bíla innandyra allan ársins hring við bestu aðstæður. Þar verður hefðbundin vatnsslanga til skolunar, háþrýstidæla með sápuhólfi, öflug iðnaðarryksuga, sorpílát, vaskur, vatnssköfur og fl. sem þarf til að eigendur bila geti hugað að bílum sínum í góðum aðstæðum.
Kostnaður
Virðisaukakvöð hvílir á eigninni og yfirtekur kaupandi hana. Ef kvöðin er ekki yfirtekin bætist hún til greiðslu ofan á kaupverðið.
Kostnaður er hefðbundinn. Auk kaupverðs og reglulegs húsgjalds í húsfélag þarf kaupandi að standa skil á stimpilgjaldi af kaupsamningi og þinglýsingargjaldi af kaupsamningi, sem og umsýsluþóknun kaupanda til fasteignasala. Þar sem um nýbyggingu er að ræða greiðir kaupandi skipulagsgjald, 0,3% af endanlegu brunabótamati, þegar það er lagt á.
